விரிவுரையாளர் தேசிய தகுதித் தேர்வு: 2 ஆயிரம் பேர் பங்கேற்கவில்லை

மதுரையில் ஞாயிற்றுக்கிழமை நடைபெற்ற கல்லூரி விரிவுரையாளர்களுக்கான தேசியத் தகுதித் தேர்வை 2 ஆயிரம் பேர் எழுதவில்லை.

பல்கலைக்கழக மானியக் குழு சார்பில், மத்திய இடைநிலைக் கல்வி இயக்ககம் மூலம் ஞாயிற்றுக்கிழமை கல்லூரி விரிவுரையாளர்களுக்கான தேசியத் தகுதித் தேர்வு நடைபெற்றது. மதுரை மாவட்டத்தில் 15 மையங்களில் நடைபெற்ற இத்தேர்வை, மதுரை காமராஜர் பல்கலைக்கழகம் ஒருங்கிணைத்தது.

இத்தேர்வை எழுத 9,154 பேர் விண்ணப்பித்திருந்தனர். ஆனால், இதில் 2 ஆயிரம் பேர் தேர்வெழுத வரவில்லை.

தேர்வு மையங்களை, பல்கலைக்கழகப் பதிவாளர் என். ராஜசேகர் ஆய்வு செய்தார்.

அனைத்து மையங்களிலும் போலீஸ் பாதுகாப்பு போடப்பட்டிருந்தது.

முந்தைய தேர்வு வரை பல்கலைக்கழக மானியக் குழு சார்பில், மத்திய அரசு தேர்வாணையம் மூலம் நடைபெற்று வந்த இந்தத் தேர்வு, தற்போது முதல்முறையாக மத்திய இடைநிலைக் கல்வி இயக்ககம் சார்பில் நடத்தப்பட்டது குறிப்பிடத்தக்கது.